Sa biografia
de Paco de Lucia
(pro Dariu Piga)
Cando bessint a mascagna fatta
sun tottu mudados che puzzones
cun vetturas de parizos miliones
cun gianchetta autista e cravatta
in ristorante los attendet s'orata
s'ispigula umpare a sos gamberones
brindande cun muscadu e cun nepente
a sa faccia de su contribuente
Sas familias sighin a su tira tosta
pro nde ogare su pane cada die
ca sa vida a dies de oje cara costa
e s'abba mancat a ora de mesu die
si sighit gai nos ponet sa crosta
ribellamunos pro custu contro a chie
nos rappresentat et est isente
ca tenede fagher de incumpetente
Dae onzi parte signales de siccagna
arruinadas pasturas e ortalissas
tamatas pro sa disizzada bagna
a las bider incodomadas paren frissas
sos massajos pianghen s'insoro campagna
sos preideros lu lamentan in sas missas
cun sas bestias malaidosas e racchiticas
tottu curpa de sa pestes politicas
Dae sa Regione bonos a ciarrare
chi nde devian tenner sa cara in terra
contra a pare si faghene sa gherra
e no si impignan pro nudda a triballare
nos mancat s'abba finas pro buffare
la comporamus a prezios de cunterra
ite irgonza a tenner tottu a una pumìa
in sa Regione cun sa "bella autonomia"
